Heyskapurinn og olían.

Ég var að telja saman rúllurnar í dag.  Þær eru töluvert fleiri en í fyrra.  Og trúlega bætist eitthvað við  sýnist mér.      Bændur eru byrjaðir að flengjast þriðja sláttinn þetta sumarið.  Enn höfum við Sunnlendingar notið veðurblíðu og getað stundað heyskap líkt og eftir pöntun.  Heygæðin eru eftir því.

Það eru fleiri en atvinnubílstjórar sem olíuverðið hittir beint um leið.   Tekur í (veskið, skapið, skrokkinn...)   orðið að fá olíubílinn í hlað og fylla tankinn við skemmuna.    Þetta er galið.  Og ekki batnar álitið á gömlu olíufélögunum þegar fréttist að álagning félaganna hefur stórhækkað síðustu mánuði.    Hækkandi heimsmarkaðsverð er nú alveg nóg handa okkur.

Það þýðir ekkert að afsaka sig með háum fjármagnskostnaði.   Er hann vegna kostnaðar við glamur bensínstöðvar?

 

Athugasemdir

[Árni Gunnarsson, 19.8.2008 kl. 00:22]

Skrapp norður á Sauðárkrók um helgina í sumarblíðunni. Þar hitti ég kunningja minn sem rekur hestaleigu og til að búa sig undir hækkandi verð á heyi þá brá hann á það ráð að bera á öll eigin tún og heyja sem mest fyrir veturinn. Hann fékk ágæta sprettu og er núna búinn að heyja þessi tún í stóra rúllubagga. Áburðurinn kostaði 4000 pr. rúllu og plastið 1600.=5600.

Þá er eftir öll vinna. Þetta ofbauð mér nú satt að segja og ég sé ekki fyrir mér að húsnotkun á tómstundahestum verði óbreytt hjá hestamönnum við þær efnahagshorfur sem sýnast vera fram undan. Og verð á framleiðsluvörum bænda hlýtut að hækka verulega eigi þeir að halda í horfinu og greiða niður skuldir jafnframt stórauknum rekstrarkostnaði.

Ég sé fyrir mér að nú taki við breytt viðskiptaumhverfi og beinni tengsl milli bænda og neytenda. Við það mun verksmiðjubúskap ljúka, en smærri bú fara að berjast um viðskipti. Kannski er það líka eðlilegast þegar grannt er skoðað.

Nú gefa bændur út veiðileyfi á gamlan bónda sem leyfir sér svona kjaftæði.

[P.Valdimar Guðjónsson, 21.8.2008 kl. 16:57]

Sæll Árni.

Það er alveg morgunljóst að þessar hækkanir koma fram víða og ekki síður í hestamennskunni en annarsstaðar.

Allt leitar þetta í að stækka og líklega snúið að vinda ofan af því.  Í svona árferði  (ástandi)  hljóta hinsvegar skuldir að ráða miklu um afkomuna.  Þar eru hinir "smærri" líklega ekkert verr staddir þessa dagana.

Takk fyrir innlitið. 

kv. Valdimar.