Tala íslensku, já takk.

Ég var fréttaritari Morgunblaðsins um tuttugu ára skeið hér á þessu svæði.

Sat eitt sinn á fundi með ritstjórum og fréttastjórum þar sem  Styrmir greindi frá  því að blaðið  hefði hafnað nokkrum tillögum að auglýsingum og innsendum texta bara þann daginn.  Ástæðan  var enskuskotið efni og  fyrirsagnir.   Beðið um að sumar þeirra væru jafnvel á ensku.       Öll slíku var hafnað og auglýsendum greint frá  stefnu blaðsins í þessum málum og fólk beðið að endurskoða og "þýða" efnið.

Þá varð manni ljóst hve þessi varðstaða Morgunblaðsins um árabil skipti miklu máli fyrir málvitund almennings.    Þá meina ég að smeygja ekki slettum inn í málið á lymskulegan hátt.     Tek hinsvegar fram að ég tel bestu málvernd íslenskunnar vera góða færni í erlendum tungumálum.    Það er allt annað mál en að skjóta enskum orðum inn hér og þar á opinberum vettvangi. 

Dæmi um þetta í augnablikinu má nefna orðið "outlet"  , allt í einu er útsala ekki nógu fínt orð. Einnig"Taxfree".  Busl og sprikl Íslendinga í vinsælum þáttum á STÖÐ 2   þarf endilega að heita "wipeout", ?     Hví í ósköpunum má ekki finna þessu íslenskt nafn skil ég ekki.  Einnig hafa menn hætt að íslenska titla á amerískum bíómyndum nema í undantekningartilfellum.

Eftirgjöf er sýnileg á hverjum degi hjá tungu vorri íslenskunni mót enskunni sem smýgur æ meir inn í hvern textann af öðrum.   Heilu fyrirsagnirnar  eru á engilsaxnesku.    Það hallar því eflaust nokkuð undan okkar ástkæra ylhýra,  þessi misserin.