Rándýrskapitalismi.

Heyrði talað um rándýrskapítalisma.   Þessari nafngift var slengt á hegðun hálftrylltra áhættufíkla sem vélað hafa með fjármál og fjármuni almennings og fyrirtækja síðustu árin.       Með afleiðingum sem nú allir þekkja. Ekki verri skilgreining en önnur. Færa má fyrir því rök að þeir hafi hagað sér líkt og rándýr (eða jafnvel verr).    Við vitum líka alltof vel hversu rándýrt þetta allt saman reyndist.

Áður man ég eftir þessu orðasambandi í öðru samhengi.     Jón Pálsson nú látinn, var á ofanverðri síðustu öld ráðinn héraðsdýralæknir hér á Suðurlandi. Svæði hans var í upphafi gífurlega stórt og var hann einn með tvær sýslur að mig minnir.        Að sjálfsögðu fóru menn að kalla hann  “Jón dýra”, í tvíræðri merkingu. 

Á Selfossi tók síðan við af honum Jón Guðbrandsson sem dýralæknir í neðri hluta Árnessýslu.  Jón er nú hættur störfum.  Hann var af gárungunum kallaður  “Jón rándýri” af enn meiri tvíræðni.

  Báðir eftirminnilegir sómamenn í leik og starfi.