Hví er svo komið?

Geir Haarde er hinn vænsti maður.  Virkar á mig sem náungi  sem fólki fellur vel við.  "Likeable person" kallar tjallinn það stundum.  Ekkert út á hann að setja.

 En alvarlegir hlutir gerðust á hans vakt.   Svo alvarlegir að horft er á þá undrunaraugum um allan heim.   Við vitum öll orðið nú nokkurn veginn hvað gerðist.   En afleiðingarnar eru allar eftir .  Þykir þó flestum nóg við að glíma þessa dagana.

Geir hefur einangrast og misreiknað stöðuna gagnvart almenningi.    Of upptekinn við björgun? Kannski. Að skipta til dæmis ekki um ráðherra um áramót voru alvarleg mistök

Svo farið sé ár eða lengra  aftur í tímann þá hlýddi hann ekki viðvörunum.   Ekki Ingibjörg Sólrún heldur að því er virðist.    Tali Guðna um daufgerða ríkisstjórn reyndist því miður rétt.

Nema komi hér til uppstokkun og stjórnendur með nýja framtíðarsýn mun halla hratt undan fæti.   Við myndum verða vanþróað land hvað fjárhagslega getu varðar.  Með kröpp kjör. Og sligandi skuldir.

   Við erum fámenn.   Það þýðir mikið varnarleysi gagnvart fjárhagslegum áföllum kerfisins líkt og við þekkjum nú allt of vel.

En.  Fámennið er líka kostur.    Náist hingað erlend fjárfesting inn í landið og ferðmannaiðnaðurinn haldi áfram vexti  sínum verðum við fljót að rétta úr kútnum.  Þetta er vegna þess að innspýting deilist á svo fáa.    Getum þess vegna bundið vonir við að atvinnustigið rétti fljótt við í plús áttina.

Hér ríkir aftur á móti gífurlegt vantraust til valdhafa.  Um ástæður þess þarf varla nokkur að vera hissa.