Umferðin um Bæjarhreppsveginn.

Var að heyja á túni uppvið Eilífsskjól. Þetta er þurrt og gott ræktarland sem var áður í landi Syðri Gegnishóla.   Frændi minn keypti þarna landskika fyrir tveimur árum en ég hef nytjað túnið til slægna og einnig ræktað þarna rýgresi.    Það er hæð þarna við veginn  sem heitir þessu skemmtilega nafni.

Svosem nóg ræktarland hérna í Gaulverjabæ,en þetta land liggur alveg afskaplega vel við samgöngum og stutt á bundið slitlag sem er draumur í heimkeyrslu heyja og útkeyrslu áburðarefna sem fylgir. Þolinmæðin til að hossast langar ósléttar brautir minnkar með árunum, þó Traktorarnir séu reyndar með lúxus sætum og húsum nú til dags.

Manni verður starsýnt á hve umferð hefur aukist hér á síðustu árum.   Það er í raun með ólíkindum.  Fyrir  örfáum árum þekkti maður hvern bíl og hver var á ferð.  (Svakalega sveitalegt ég veit það, en alveg eins og hverjum öðrum smábæ)    En ekki lengur.     Túrisminn er að nema land hér með batnandi vegakerfi.     Mikil íbúafjölgun hefur verið hér í Flóahreppi og mikið byggt.  Fjöldi nýrra smábýla hefur risið og rísa nú þessa dagana með Gaulverjabæjarvegi. Einnig eru dæmi þess að fólk af höfuðborgarsvæðinu hafi tekið fyrirtækin og atvinnuna með sér hingað í Flóann.

Já mér varð semsagt starsýnt á hve umferðin var mikil í dag, á fimmtudegi.  Fyrir 10 árum eða svo voru þetta bændur að fara í kaupstað, kannski tvisvar í viku.   Nú vinnur stór meirihluti íbúa útifrá og sækir vinnu jafnvel á höfuðborgarsvæðið. Búum með hefðbundinn búskap hefur fækkað.  Þannig að margt hefur breyst.  Hestamennsku virðist fylgja mikil umferð , en sú atvinnugrein er vaxandi hér.  Hestamenn eru ferðaglatt fólk og stundum er gantast með að hross séu meira keyrð í kerrum en þeim riðið.   Mannlífið er ágætt og nýir íbúar eru duglegir að sækja samkomur hér á þessu "menningarsvæði" og aðlagast vel.

En ég hef heyrt að skokkarar á Selfossi séu ekki allir jafn ánægðir.    Menn eins og Þór Vigfússon hafa haft orð á þessu.  Áður gátu þeir beygt til suðurs hjá Smiðjunum  í átt til sjávar og hlaupið friði og ró.  Sá friður er úti og vissara að passa sig á blikkbeljum.