Fyrsta tuggan.

Við rúlluðum fyrst sláttinn nú undir kvöld.  Í blæstri og gósentíð.  Rétt til að liðka tækin tókum við 12 rúllur niður í Vöðlakoti.      Það átti nú reyndar að verða kúabeit, en spratt svo hressilega að það  var slegið.  Kemur fljótt há á þetta aftur sem  kýrnar gera eflaust góð skil.  Sló síðan sex hektara aftur í dag.   Sprettan væri frábær hefði áburðurinn skilað sér á réttum tíma !.     Við sem keyptum Yara áburð sem SS flytur inn þurftum að bíða eftir sendingunni til Þorlákshafnar.

Ég er búin að endurrækta alla kúablettina hérna nálægt bænum.  Þeir voru nú í allskyns ástandi og kargaþýfðir sumir.     Það skiptir mál hversu grösugt og lystugt fer ofan í gripina, ekkert síður á sumrin en á veturna.

Prófaði finnska merkið Valmet á traktor.   Fann einn tólf ára gamlan en í góðu lagi.  Aldrei keypt traktor þar sem fylgdi með smurbók samviskusamlega útfyllt af eiganda  og smurstöðinni í Borgarnesi.  Ætti að vera gæðastimpill á meðferðina.  Hann er afturdrifinn og aðeins ætlaður í heyskap, hauginn og áburðinn.  Finnst nóg að eiga einn fjórhjóladrifin.  Nóg kostar olían samt.   Hann er nokkuð lipur þessi og stýrið mjög gott.

Athugasemdir

[Kristján Eldjárn Þorgeirsson, 18.6.2008 kl. 19:26]

Sæll Valdimar!

Það er alltaf gaman að sjá þegar þið bændur í Bæjarhverfinu eruð byrjaðir að slá, krafturinn er svo mikill svo ekki sé minnst á driftina, enda alvöru bændur hér á ferð.  Vonandi að heyskapur gangi vel hjá þér þetta árið sem og alltaf.  Nú er aldeilis tíðarfar til að heyja!

Kærar kveðjur