Tillitsleysi fjölmiðlunga við nýbúa.

Það fer pínulítið í taugarnar á mér þegar hraðmælandi kjaftakarlar og kerlingar í útvarpi tala við nýbúa, eða þá sem eru ekki alveg fullmælandi á íslenska tungu.  Og slá hvergi af.

 Dæmi um þetta var á Rás tvö í gær.   Freyr Eyjólfsson á Rás 2 var að spjalla við útlending sem greinilega var ekki með full tök á íslenskunni eins og gengur.

Hann talaði eins og hríðskotabyssa og valdi frekar flóknari orð en einfaldari, er hann spurði spurninga.   Það olli því að viðmælandinn þurfti oft að segja ha, og Freyr margsinnis að endurtaka sig.  Þannig að enginn tími sparaðist, sem er sennilega ástæðan fyrir óðmælgi fjölmiðlunga.

Mér finnst þetta óþarfi.  Það er nú kurteisi við þessar aðstæður að tala aðeins hægar og velja stutt og hnitmiðað orðfæri þegar fólk er að ná tökum á okkar ástkæra ylhýra.