Ótíð.

Það er ótíð í fjármálalífinu þessa dagana.

Sérkennilegast af öllu síðustu daga finnst mér þó hve margir vilja persónugera vandræðin í Davíð Oddsyni!    Það er stúdía fyrir sálfræðinga hve sá maður situr í sinni sumra, boðar þar allt illt og er kennt um flest.

Ég er ekki frekar en aðrir sáttur við vaxtaokrið og sífelldar hækkanir stýrivaxta og þar með skulda vorra dag eftir dag.     En kallarnir í Seðlabankanum eru sýnist mér einungis að vinna vinnuna sýna útfrá þeim lögum og peningastefnu sem gildir í dag.   Þá stefnu má hinsvegar eflaust fara að endurskoða eftir dýrkeypta reynslu, en það er önnur saga.

Samt alveg ljóst að við ráðum ekki lengur ferðinni og það er kannski óþægilegast.  Það eru spekúlantar og hreinræktaðir braskarar aðallega erlendis, (kallaðir ýmsum nöfnum)  sem ráða ferðinni í íslenskum efnahagsmálum nú um stundir.

Ég er ekki alltaf sammála Hallgrími Thorst útvarpsmanni sem nú er tekinn við Vikulokunum á Rás 1. Hann er mjög hallur undir ESB og fer ekkert leynt með það.   Auðvitað eiga menn rétt á sínum skoðunum en fréttamenn missa bara ákveðinn trúverðugleika þegar þeir taka annan pólinn í viðkvæmu neistaflugi.

En úttekt Hallgríms á bloggi hans, er athyglisverð á núverandi fjármáladýfu. Hann rifjar upp hve sumir voru forspáir.  Flest allt er að koma fram.  Þetta brask með tilfærslu t.d. japanskra yena í hávaxtamyntir eins  og íslenska krónu.  Slíkt eykur peningamagn í umferð og sprengir  um gjaldmiðilinn ásamt vöxtunum og heldur betur þegar um dvergastærðir er um að ræða í alþjóðlegu samhengi.  (Íslenskt fjármálakerfi á stærð við Bristol á Englandi sagði einhver í dag). Sjá hér www.hallgrimur.eyjan.is     Hingað kom semsagt þekktur sjónvarpsmaður í ágúst og gerði bæði grín og ítarlega útlistun á fjárglæfra línudansinum hér.  Hitti naglann á höfuðið og flest sem hann spáði hefur átt sér stað.  Enginn hlustaði hinsvegar þá, enda allir enn í  góðærisvímu.

Aðeins hefur landbúnaðurinn komist í umræðuna síðustu daga. Rétt að rifja upp að hækkanir sem því miður  voru óumflýjanlegar voru ekki vegna "kerfisins".  'I löndunum í kringum okkur horfa menn einnig upp á fleiri tugir prósenta í kostnaðarauka. 

 Sumir telja þeim atvinnuveg betur borgið í ESB ætli fjármálaöflin að gleypa þá grein líkt og allt annað.  Svo segir allavega hér í dag www.http://bjorgvin.eyjan.is/hryggur.htm  Það er sjónarmið.

Eftirfarandi af þessari síðu finnst mér þó best.;

"Af þeim sökum á ég það sameiginlegt með lambhrútnum sem hoppaði glaður um grösug tún sumarlangt, að verða hryggur. "