Koltvísýringur. Lífgjafinn.

Það var athyglisverð mynd í sjónvarpinu í gær um jörðina okkar. Merkilegt  þetta með koltvísýringinn sem allir óttast í dag vegna hlýnunar og mengunar.

Þessi sami sýringur hækkaði hinsvegar hitastigið á jörðinni þannig að byggilegt varð aftur eftir síðasta "snjóboltaskeið".     Varla alslæmt.

"Lookið" og myndvinnslan í þessari fræðslumynd var frábær.  Ég skildi allavega betur hvernig kvikan ólgar undir okkur og í hvaða áttir hún streymir.

Það er fallegur sumardagur.  Sólin skín og fjallahringurinn skartar sínu fegursta. Ilmur af vori og sumri með fyrstu slægju á stöku bæ.  Yngstu börninn  hlaupa skríkjandi  á grænu grasinu.  Yfir stendur boðhlaup og skipt er í tvö lið.  Það er hlaupin ákveðin vegalengd og síðan keyrðar hjólbörur eftir ákveðnum þrautakóng.    Ég stend biðröðinn ásamt fleirum og bíð eftir að röðin komi að mér.  Við hvetjum okkar lið.  Stína er að keyra og eineitir sér mjög að keyra eftir mjóum planka.

Óvenju fagur 17. júní.  Ég virði þetta allt fyrir mér meðan að ég bíð.  Allt í einu  liðast landið.  Gegnishólahverfið ,Eilífsskjól , beitilandið og klofsteinn ganga í bylgjum.  Drunur heyrast úr fjöllum.  Á þessu augnabliki breyttist algjörlega mín  sín á að hafa fast land undir fótum.   Það er líklega ekki til. Allavega hér sunnanlands á 80 til 100 ára fresti.

Mér varð hugsað til þessa þjóðhátíðardags árið 2000 þegar ég horfði á myndina í gærkvöldi.  Landið bókstaflega liðaðist til líkt og þunn skurn ofan á olgandi kviku.  Sem tjarnarblaðka  á tjörn.  Enda rímaði þetta við það sem undir okkur er.

Ég gerði einhvern tíma í skóla ritgerð sem var tengd stjörnufræði að mig minnir.   Þar var tiltekið hversu ótal margt þarf að hitta saman svo þróast geti líf.  Makalaust hversu margt smellur saman til að gera þetta allt mögulegt hjá okkur hér.  Tökum bara einn hlut út sem er aðdráttaraflið.   Af einhverjum ástæðum er það nákvæmlega "rétt stillt" fyrir okkur.  Sem og ótal margt annað.

En Stína missti alveg af fyrri skjálftanum árið 2000. Upptekin í boðhlaupinu fræga, sem rennur sveitungum örugglega seint úr minni.

 

 

Athugasemdir

[Ragnar Geir Brynjólfsson, 13.3.2008 kl. 21:43]

Já, þetta var athyglisverð mynd og einnig sú sem fylgdi í kjölfarið núna á mánudagskvöldið. Þarna er verið að orða hluti á skýran hátt að maður skilur mun betur en áður kenningar um þróun jarðarinnar.

Athyglisverð lýsing hjá þér á jarðskjálftanum 2000. Þetta hefur verið sjón að sjá, þ.e. landið liðast í bylgjuhreyfingu. Ég var staddur innandyra á Selfossi þetta andartak en heyrði talsverðan hvin uþb. 5-10 sekúndur áður en skjálftinn reið yfir.